ڈیرہ اسماعیل خان+گھوٹکی ( صباح نیوز) ڈی آئی خان اور گھوٹکی میں ٹریفک حادثات کے دوران خاتون، 2بچوں سمیت5افراد جاں بحق ہو گئے۔ تفصیلات کے مطابق ڈیرہ درابن روڈ پر کے گرہ اخمد کے قریب موٹر سائیکل پر سوار ایک ہی خاندان کے 6افرادپشاور سے کوئٹہ جانیوالی تیز رفتار لینڈ کروزرسے ٹکرا گئے۔ حادثے میں موٹر سائیکل پر سوار بد قسمت خاندان کے3 افراد جن میں والدہ، بیٹا، بیٹی سمیت موقع پر جا ں بحق ہوگئے جبکہ میاں اور دو بچے، ایک بیٹا اور بیٹی شدید زخمی ہوگئے جنہیں فوری طور پر مفتی محمود میموریل ٹیچنگ ہسپتال منتقل کردیا گیا۔پولیس ذرائع کے مطابق لینڈ کروزر سوار وکیل عدالتی پیشی کے سلسلے میں پشاور سے کوئٹہ جارہا تھا۔علاوہ ازیںگھوٹکی میں نوکوٹ کے مقام پر ٹرالر اور مزدا میں تصادم سے 2 افراد جاں بحق اور 2 شدید زخمی ہو گئے، جاں بحق اور زخمی افراد مویشیوں کے بیوپاری تھے حادثے میں 8جانور بھی مر گئے۔نعشوں اور زخمیوں کو ڈی ایچ کیو ہسپتال میرپور ماتھیلو منتقل کر دیا گیا ۔