چیچہ وطنی‘ کسووال (نامہ نگاران)چیچہ وطنی کا ایک اور سپوت وطن عزیز پر قربان ہو گیا، جسے سینکڑوں سوگواروں کی موجودگی میں فوجی اعزازات کے ساتھ سپرد خاک کر دیا گیا۔ تفصیلات کے مطابق نواحی گائوں 119/13-AL کا رہائشی رائو محمد سبحان ولد صوبیدار رائو اختر علی مرحوم پاک آرمی کی طرف سے پنجگور میں اپنی ڈیوٹی سر انجام دے رہا تھا کہ دہشتگردوں سے لڑتے ہوئے شہید ہو گیا جسے گزشتہ روز پورے فوجی اعزازات کے ساتھ سپرد خاک کر دیا گیا۔ نماز جنازہ شہید کے بڑے بھائی پاک نیوی کے ملازم رائو کامران نے پڑھائی جس میں علاقہ بھر سے پانچ سو سے زائد افراد نے شرکت کی۔ پاک آرمی کے چاک و چوبند دستے نے شہید کی قبر پر سلامی دی اور صدر پاکستان اور آرمی چیف کی طرف سے شہید کی قبر پر پھولوں کی چادر چڑھائی گئی۔