تربت: دہشتگردوں کی فائرنگ، لانس نائیک شہید، 3 زخمی: فورسز آپریشن، کالعدم بی ایل اے کا مرکزی تخریب کار ہلاک
اسلام آباد (سپیشل رپورٹ) تربت کے ضلع کیچ کے علاقہ پدراک میں دہشتگردوں کی سکیورٹی فورسز پر فائرنگ میں لانس نائیک شہید‘ فائرنگ کے تبادلے میں 3 جوان زخمی ہوئے، سکیورٹی اہلکار معمول کی پٹرولنگ پر تھے واقعہ تربت سے 35 کلو میٹر دور جنوب مشرقی ضلع کیچ کے علاقہ پدراک میں پیش آیا۔ آئی ایس پی آر کے مطابق سکیورٹی فورسز کے علاقے کا محاصرہ کرکے دہشتگردوں کی تلاش شروع کر دی ہے۔ اس کے بعد ایف سی نے گذشتہ روز بلوچستان کے علاقہ تربت کے بولیدہ نامی جگہ پر انٹیلی جنس کی بنیاد پر ایک آپریشن کیا جس میں کالعدم بلوچستان لبریشن آرمی کا ایک دہشتگرد مارا گیا۔ ایف سی نے بڑی مقدار میں اسلحہ جن میں بارودی سرنگیں، گولیاںاور مواصلاتی آلات شامل تھے قبضہ میں لے لئے۔ ایف سی نے بلوچستان میں دہشتگردی کی ایک بڑی واردات کا ناکام بنا دیا۔
