زرداری کی 65ویں سالگرہ، لاہور میں آج کیک کاٹنے کی 3 بڑی تقریبات ہونگی
لاہور (نامہ نگار) سابق صدر مملکت اور پاکستان پیپلز پارٹی پارلیمنٹیرینز کے صدر آصف علی زرداری کی 65ویں سالگرہ آج اتوار 26 جولائی 2020 منائی جائیگی۔ پیپلزپارٹی پنجاب اور لاہورکی تنظیمیں اور عہدیداران آصف علی زرداری کی سالگرہ کے موقع پر تقریبات کا انعقاد کریں گے۔ کیک کاٹے جائیں گے۔ پاکستان پیپلز پارٹی لاہور کے صدر حاجی عزیز الرحمن چن کی رہائش گاہ گلبرگ تھری میں پنجاب اور لاہور تنظیم کی قیادت میں آصف علی زرداری کی سالگرہ کے کیک کاٹنے کی تقریب ہو گی۔ پاکستان پیپلز پارٹی لاہور شعبہ خواتین کی جنرل سیکرٹری سونیا خان کی رہائش گاہ ڈیفنس، بلاک ڈبل ایکس میں آصف علی زرداری کی سالگرہ تقریب منعقد ہوگی۔ اسلم گڑا ٹاؤن شپ میں تقریب منعقد کریں گے۔ پیپلز پارٹی کے میڈیا ایڈوائزر سجاد انور کے مطابق سالگرہ کی تقریبات میں کرونا ایس او پیز پر عملدرآمد کیا جائے گا۔
