لاہور،سندر، رینالہ خورد (نامہ نگار+ نمائندہ خصوصی) رینالہ خورد میں مزدے کی ٹکر سے موٹر سائیکل سوار ایک خاندان کے5 افراد جاں بحق ہوگئے۔ سندر میں ٹرالر نے موٹر سائیکل کچل دی۔ جس پر سوار میاں بیوی اور2 بچے موقع پر دم توڑ گئے، شیرگڑھ میں ٹرک کے نیچے آ کر 13 سالہ قربان چل بسا، تفصیلات کے مطابق پہلا حادثہ رینالہ خورد اختر آبادکے قریب پیش آیا۔ قومی شاہراہ پر مزداکی موٹر سائیکل کو ٹکر کے نتیجے میں موٹر سائیکل پر سوار ایک ہی خاندان کے5 افراد ایک مرد 2 خواتین اور 2 بچے موقع پر ہی جاں بحق ہوگئے۔ مرنے والوں میں 18 سالہ عرفان 30 سالہ نازیہ 60 سالہ زرینہ 5 سالہ عشاء اور 3 سالہ ابیہا شامل ہیں۔ اطلاع ملتے ہی ریسکیو 1122 کی ٹیمیں موقع پر پہنچ گئیں علاوہ ازیںملتان روڈ تھانہ سندر کی حدود میں تیز رفتار22 ویلر ٹرالر نے موٹر سائیکل سوار فیملی کو کچل دیا جس کے نتیجے میں میاں بیوی 2 بچوں سمیت موقع پر ہی جان بحق ہوگئے۔ منیر احمد فیملی کے ہمراہ موٹر سائیکل پر شیخوپورہ سے مانگا منڈی جا رہا تھا۔ ملتان روڈ سندر کے مقام پر تیز رفتار ٹرالر نے پوری فیملی کو بری طرح کچل دیا جس کے نتیجے میں میاں بیوی 40 سالہ منیر احمد اور35 سالہ شکیلہ اپنے بچوں حماد اور فاطمہ سمیت موقع پر جان بحق ہوگئے۔ ٹرالر ڈرائیور فرار ہوگیا۔ سندر پولیس نے ٹرالرکو قبضہ میں لیکر قانونی کاروائی شروع کر دی۔