نئی دہلی (نیٹ نیوز) بھارتی وزیراعظم نریندر مودی 5 اگست کو بابری مسجد کی جگہ مندر کی تعمیر کا سنگ بنیاد رکھیں گے۔ عالمی خبر رساں ادارے کے مطابق ایودھیا میں بابری مسجد کی متنازع زمین کی جگہ پر 161 فٹ بلند مندر کی تعمیر کا سنگ بنیاد وزیراعظم مودی رکھیں گے جس کے لیے 5اگست کی تاریخ رکھی گئی ہے، اسی تاریخ کو گزشتہ برس مودی سرکار نے آرٹیکل 370 کو منسوخ کرکے کشمیر کی خصوصی حیثیت ختم کردی تھی اور وادی کو دو یونین ٹریٹری میں تبدیل کردیا تھا۔ شدت پسند ہندو قوم پرست جماعت وشوا ہندو پریشد یا ورلڈ ہندو آرگنائزیشن کے مطابق 5 اگست کی تاریخ علم نجوم کے مطابق ہندوؤں کے لیے نیک شگون ہے اس لیے اسی دن مندر کا سنگ بنیاد رکھا جائے گا۔ تاہم کرونا وائرس کی وجہ سے عوامی اجتماع کے بجائے رسومات کو براہ راست نشر کیا جائے گا اور صرف مخصوص لوگ تقریب میں شرکت کریں گے۔ واضح رہے کہ بھارتی سپریم کورٹ نے گزشتہ برس 9 نومبر کو 2019 کو بابری مسجد کی متنازع زمین پر رام مندر تعمیر کرنے اور مسلمانوں کو مسجد کی تعمیر کے لیے متبادل جگہ فراہم کرنے کا حکم دیا تھا جس پر مسلم رہنما اسد اویسی نے کہا تھا کہ مسلمانوں کو مسجد کے لیے 5 ایکڑ زمین کی بھیک نہیں چاہئے۔ منتظیمن کا کہنا ہے کہ اس تاریخ کا انتخاب ہندو عقیدے کی جنتری میں شبہ یا مقدس دن دیکھ کر کیا گیا۔ تاہم ناقدین کے مطابق اس کے سیاسی محرکات ہیں کیونکہ مودی حکومت نے پچھلے سال اسی دن جموں کشمیر کی نیم خود مختار حیثیت ختم کر دی تھی۔