لاہور (نامہ نگار) شہر کے مختلف علاقوں میں ڈاکوؤں اور چوروں نے ڈکیتی و چوری کی وارداتوں کے دوران متعدد شہریوں سے لاکھوں روپے مالیت کی نقدی، طلائی زیورات، موبائل فون، موٹر سائیکلیں،گاڑیاں اور دیگرسامان لوٹ لیا۔ تفصیلات کے مطابق ڈاکوؤں نے کاہنہ میں محسن کے گھر گھس کر اہلخانہ کو یرغمال بنا کر5لاکھ 35 ہزار روپے‘ باٹا پور میں میاں انوار کے گھر سے 4لاکھ 10ہزار روپے، مصطفیٰ ٹاؤن میں فاروق کے گھر گھس کر3 لاکھ60 ہزار روپے‘ وحدت کالونی میں وسیم کے گھر سے 2لاکھ40 ہزار روپے، شادمان میں سلطان کے گھر سے 2لاکھ10ہزار روپے مالیت کی نقدی، موبائل فون، طلائی زیورات اور دیگر سامان لوٹ لیا۔ مستی گیٹ میں ڈاکوؤں نے فیصل سے 70 ہزار روپے اور موبائل فون، جوہر ٹاؤن میں سلیمان سے38ہزار روپے اور موبائل فون، نولکھا کے علاقہ میں زبیر سے24ہزار روپے اور موبائل فون لوٹ لیا۔ گلبرگ تھری میں چوروں نے آمنہ ملک کے گھر سے ایک لاکھ دس ہزار روپے مالیت کے تین بکرے چوری کر لئے۔ ستوکتلہ اور مسلم ٹاؤن کے علاقوں سے 2کاریں جبکہ ٹاؤن شپ، شالیمار، کوٹ لکھپت، مصری شاہ اور راوی روڈ کے علاقوں سے5 موٹر سائیکلیں چرا لی گئیں۔