بند روڈ پر ڈور پھرنے سے موٹر سائیکل سوار بچی اور والد زخمی
لاہور (نامہ نگار) سگیاں پل کے قریب بند روڈ پر چار سالہ بچی اور اس کا والد کٹی پتنگ کی ڈور پھرنے سے زخمی ہو گئے۔ تفصیلات کے مطابق شہر میں پتنگ بازی کا خونی کھیل جاری ہے جبکہ پولیس بلند بانگ دعووں کے باوجود پتنگ بازی پر قابو پانے میں ناکام ہے۔ سگیاں پل کے قریب بند روڈ پر چار سالہ بچی فاطمہ اپنے والد پرویز اور والدہ کے ہمراہ موٹر سائیکل پر جشن آزادی کی رونقیں دیکھنے نکلی تھی۔ بند روڈ پر بچی فاطمہ گلے پر ڈور پھرنے سے شدید زخمی جبکہ اس کا والد محمد پرویز معمولی زخمی ہو گیا۔ زخمی بچی فاطمہ کو طبی امداد کے لیے میو ہسپتال منتقل کر دیا گیا جبکہ اس کے والد کو موقع پر ہی طبی امداد فراہم کر دی گئی ہے۔ مقدمہ درج کرنے کے لئے تھانہ ساندہ اور تھانہ اسلام پورہ کی پولیس حدود کا تعین کرتی رہی۔
