جنرل باجوہ کی سعودی فوجی قیادت سے ملاقاتیں، ملٹری تعلقات پر تبادلہ خیال
ریاض +اسلام آباد (ممتاز احمد بڈانی +سٹاف رپورٹر) آرمی چیف جنرل قمر جاوید باجوہ سرکاری دورہ پر سعودی عرب پہنچ گئے ہیں۔ آئی ایس پی آر کے مطابق آرمی چیف نے سعودی عرب کے چیف آف جنرل سٹاف جنرل فیاض بن حامد الروائلی اور سعودی جوائنٹ فورسز کے کمانڈر لیفٹیننٹ جنر ل فہد بن ترکی آل سعود سے ملاقاتیں کیں۔ ان ملاقاتوں کے دوران فوجی تعلقات، بشمول تربیتی مقاصد کیلئے تبادلوں جیسے موضوعات پر توجہ مرکوز کی گئی۔ اس سے پہلے سعودی عرب پہنچنے پر چیف آف جنرل سٹاف جنرل فیاض بن حامد الروائلی نے آرمی چیف جنرل قمر جاوید باجوہ کا خیر مقدم کیا۔ سعودی عرب کی وزارت دفاع میں آرمی چیف کو گارڈ آف آنر پیش کیا گیا۔ آئی ایس آئی چیف لیفٹیننٹ جنرل فیض حمید بھی آرمی چیف کے ساتھ ہیں۔
