فیروز والہ/ اوکاڑہ/ حجرہ شاہ مقیم (نامہ نگاران) اوکاڑہ میں نوجوان پھندے سے جھول گیا جبکہ حجرہ شاہ مقیم میں گھریلو  ناچاقی پر  خاتون نے زہر کھا کر زندگی کا خاتمہ کر لیا۔ فیروز والا میں بھی پریشان حال نوجوان نے خود کشی کر لی۔ تفصیلات کے مطابق اوکاڑہ میں نوجوان نے گلے میں پھندا ڈال کر خودکشی کر لی۔ بتایا گیا ہے کہ کرسچنی کالونی اوکاڑہ کے رہائشی چوبیس سالہ نوجوان شہزاد منیر نے نامعلوم وجوہات کی بناء پر گلے میں پھندا ڈال کر خود کشی کر لی۔ پولیس نے تفتیش شروع کر دی  ہے۔ حجرہ شاہ مقیم امداد کالونی کی رہائشی خاتون زوجہ رمضان نے گھریلو ناچاقی پر زہریلی گولیاں کھا کر زندگی کا خاتمہ کر لیا۔ فیروز والہ سے نامہ کے مطابق گھریلو جھگڑے پر نوجوان نے خودکشی کر لی۔ بتایا گیا ہے کہ تھانہ صدر کے علاقہ میں نوجوان شہزاد نے گھریلو پریشانی سے دلبر داشتہ ہوکر اپنے گلے میں پھندہ ڈال کر اپنی زندگی کا خاتمہ کر لیا۔ پولیس نے نعش ورثاء کے حوالے کر دی۔