نوشہرہ/ واشک/ حیدر آباد(نوائے وقت رپورٹ+ نیٹ نیوز+ صباح نیوز) نوشہرہ میں اسلام آباد، پشاور موٹر وے پر جبہ دائودزئی کے قریب لاہور سے پشاور جانے والی مسافر کوچ حادثے کا شکار ہو گئی جس سے 8افراد جاں بحق اور 32 زخمی ہوئے۔ دوسرے واقعہ میں واشک کے علاقہ ناگ میں کار اور وین میں ٹکر سے 3افراد جاں بحق اور دس زخمی ہوئے، تیسرے واقعہ میں حید رآباد میں ٹرک حادثے کا شکار ہو گیا جس سے 3افراد جاں بحق ہوئے۔ تفصیلات کے مطابق اسلام آباد، پشاور موٹر وے پر لاہور سے پشاور آنے والی مسافر کوچ ڈرائیور کو نیند آنے کی وجہ سے الٹ کر گہری کھائی میں جا گری۔ ریسکیو 1122 کے مطابق 8افراد کی لاشیں ہسپتال منتقل کی جا چکی ہیں۔ اب تک 32 زخمیوں کو لیڈی ریڈنگ ہسپتال پشاور منتقل کیا گیا ہے۔ ریسکیو حکام کے مطابق جاں بحق  افراد کی تعداد میں اضافہ ہو سکتا ہے۔ دوسرے علاقے واشک کے علاقے ناگ میں کار اور وین میں ٹکر سے 3افراد جاں بحق ہو گئے۔ لیویز حکام کے مطابق حادثے میں خواتین سمیت 10افراد زخمی ہیں علاوہ ازیں سپر ہائی وے نور آباد حیدر آباد پر ٹرک حادثہ میں تین افراد جاںبحق، تین زخمی ہو گئے۔