لاہور (نیوز رپورٹر) وزیرِ اطلاعات پنجاب فیاض الحسن چوہان نے کہا ہے کہ جھوٹوں کے آئی جی شہباز شریف نے کل قوم کے سامنے دو بہت بڑے جھوٹ بولے۔ پہلا جھوٹ یہ کہ انہوں نے نواز شریف کی آٹھ ہفتوں بعد واپسی کی کوئی ضمانت نہیں دی، اور دوسرا جھوٹ "ن لیگ نے ایک دھیلے کی کرپشن نہیں کی" کا مضحکہ خیز پہاڑا دہرانا تھا۔ فیاض الحسن چوہان نے کہا کہ دو دونی بتیس اور چار دونی چھتیس کے پہاڑے کی طرح یہ پہاڑا بھی عوام کے سر کے اوپر سے گزر گیا۔ انہوں نے کہا ساری دنیا جانتی ہے کہ شہباز شریف نے ہائیکورٹ سے نواز شریف کو باہر جانے کی اجازت پر ضمانت دی۔اب اس بات سے مکرنا یو ٹرن کی باتیں کرنے والے شہباز شریف کی طرف سے دنیا کا سب سے بڑا یو ٹرن ہے۔ مولانا فضل الرحمان اور شہباز شریف کی ملاقات کے حوالے سے بات کرتے ہوئے انہوں نے کہا کہ بچپن سے سنا تھا مومن کبھی ایک سوراخ سے دو بار نہیں ڈسا جاتا، لیکن پتہ نہیں مولانا فضل الرحمان آلِ شریف اور آلِ زرداری کے ہاتھوں کب تک استعمال ہوتے رہیں گے۔ فیاض الحسن چوہان نے کہا کہ میں بارہا دہرا چکا ہوں کہ مولانا ہاتھ میں تسبیح اور سر پہ ٹوپی پہن کر مصلٰے بچھا کر اپنے سیاسی، معاشی اور انتظامی گناہوں پر توبہ کریں کیونکہ 2023 میں بھی کے پی کے کی طرف سے مولانا کو مینڈیٹ دیئے جانے کی کوئی امید نظر نہیں آ رہی۔