لاہور (نیوز رپورٹر) وزیر اطلاعات پنجاب فیاض الحسن چوہان نے اپنے آفس سے جاری کیے گئے ایک بیان میں کہا  کہ وزیراعظم عمران خان کی قیادت میں موجودہ پی ٹی آئی حکومت اور الائیڈ پارٹیز فار کرپشن کے گزشتہ ادوار میں بنیادی فرق ترجیحات کا ہے۔ گیس انفراسٹرکچر ڈویلپمنٹ چارجز، کارکے رینٹل پاور پلانٹ اور آئی پی پی کیسز پر حکومتی اپروچ سب کے سامنے ہے۔ وزیرِ اعظم عمران خان کی ہدایات کے مطابق مناسب اور بروقت حکمت عملی سے حکومت نے ان تینوں کیسز سے 1244 ارب کی مجموعی بچت کی۔ انہوں نے کہا کہ گزشتہ حکومتوں نے ذاتی مفاد کو مقدم رکھتے ہوئے عوامی فلاح کے میگا منصوبے مسترد کیے لیکن وزیرِ اعظم عمران خان عوام اور ملک کے مفاد میں مشکل اور غیر مقبول فیصلے کرنے سے نہیں ہچکچاتے۔