اوکاڑہ: پولیو ٹیم پر خواتین کا حملہ‘ جوتوں سے پٹائی‘ ویکسین چھین لی
اوکاڑہ+ منڈی احمد آباد (نامہ نگاران)قطرے پلانے کیلئے گئی پولیو ٹیم پر دو خواتین نے حملہ کردیا۔ ایل ایچ وی سے ویکسین چھین لی اور اسے تشدد کا نشانہ بنایا۔ ایل ایچ ڈبلیو مسرت بیگم ہمراہ ایل ایچ ڈبلیو سمیرا منظور اوکاڑہ کے نواحی گائوں گدڑ ملکانہ میں بچوں کو ویکسین کے قطرے پلارہی تھیں کہ دو خواتین اللہ رکھی اور رشیداں بی بی نے پولیو ٹیم پر حملہ کردیا، غلیظ گالیاں دیں اور جوتوں سے پٹائی کرتے ہوئے ویکسین چھین لی۔ بال نوچے اور انہیں ویکسین نہ پلانے دی۔ جس پر پولیس تھانہ منڈی احمد آباد نے ملزمان خواتین کے خلاف مختلف دفعات کے تحت مقدمہ درج کرلیا۔
