اسلام آباد (سٹاف رپورٹر) جنوبی وزیرستان کے علاقہ شکئی میں دہشت گردوں کے ساتھ مقابلہ کے دوران پاک فوج کے کیپٹن عبداللہ شہید ہو گئے ہیں۔ آئی ایس پی آر کے مطابق انٹیلی جنس اطلاعات کی بنیاد پر سکیورٹی فورسز کے دستے اس علاقہ میں رات کے وقت دہشت گردوں کی نقل و حرکت روکنے کیلئے گشت پر مامور تھے۔ گزشتہ شب اس علاقہ میں ایک ایسی ہی گشت کے دوران دہشت گردوں نے سکیورٹی فورسز کی ٹیم پر فائرنگ کر دی۔ فائرنگ کے تبادلے کے دوران فورسز کی قیادت کرنے والے کیپٹن عبداللہ شہید ہو گئے۔ اس واقعہ کے بعد فورسز نے علاقے کو گھیرے میں لے کر دہشتگردوں کے خلاف کلیئرنس کارروائی شروع کر دی۔ کیپٹن عبداللہ ظفر شہید کی عمر پچیس برس تھی۔ ان کا تعلق کوہاٹ کے علاقہ لاچی سے ہے۔