لا ہور (نامہ نگار) سی سی پی او لاہور محمد عمر شیخ نے رات گئے پرائیویٹ گاڑی پر سگیاں، بند روڈ، رنگ روڈ اور شہر کے مختلف علاقوں کے خفیہ سرپرائز وزٹس کر کے سکیورٹی انتظامات کا جائزہ لیا۔ انہوں نے مین بلیوارڈ گلبرگ، کینال روڈ پر ڈولفن، پیرو کی پٹرولنگ کو خفیہ طور پر مانیٹرکیا۔ گلبرگ ڈولفن ٹیم سے پٹرولنگ و سنیپ چیکنگ پر بریفنگ لی اور کینال روڈ انڈر پاسز پرڈیوٹی پر مامور ٹریفک وارڈنز سے گفت و شنید کی۔ کینال روڈ انڈرپاسسز پر ہیوی ٹریفک کے داخلہ کو روکنے کیلئے تعینات وارڈنز کو دیکھ کر اطمینان کا اظہار  کیا۔ اہلکاروں  نے بریفنگ بھی دی۔ اہلکاروں نے پولیس چیف کے ساتھ سیلفیاں بھی بنوائیں۔ علاوہ ازیں سی سی پی او لاہور محمد عمرشیخ نے گلبرگ پولیس سٹیشن میں انٹی وہیکل لفٹنگ سٹاف سے میٹنگ کی۔ اس موقع پر بھی بریفنگ دی گئی۔ اس موقع سربراہ لاہور پولیس کا کہنا تھا پولیس سڑکوں پر شہریوں کے تحفظ اور مدد کیلئے ہمہ وقت موجود ہے۔ ان کامزیدکہنا تھا کہ پولیس کا ہے فرض مدد آپ کی کا نعرہ حقیقی معنوں میں اپنایا جائے۔