بیجنگ (نوائے وقت رپورٹ) چین کی معروف خاتون وی لاگر کو ان کے سابق شوہر نے اْس وقت پٹرول چھڑک کر نذر آتش کردیا جب وہ سوشل میڈیا پر لائیو سٹریمنگ کر رہی تھیں۔ عالمی خبر رساں ادارے کے مطابق چین کے صوبے سیچوان میں 30 سالہ ٹک ٹاک اسٹار لامو 14 ستمبر کو لائیو سٹریمنگ کر رہی تھیں کہ اْن کے سابق شوہر نے پہلے چاقو کے وار کئے اور پھر پٹرول چھڑک کر آگ لگا دی۔ خاتون کے ٹک ٹاک پر 8 لاکھ 85 ہزار فالورز تھے۔ ٹک ٹاک سٹار کا جسم 90 فیصد تک جھلس گیا تھا۔ انہیں ہسپتال لے جایا گیا جہاں دو ہفتے زیر علاج رہنے کے بعد دم توڑ دیا۔ سابق شوہر تینگ مفرور ہے۔ خاتون ٹک ٹاک سٹار نے گھریلو تشدد کے باعث  چند ماہ قبل ہی شوہر سے طلاق لی تھی۔