اسلام آباد (نوائے وقت رپورٹ) چند سال قبل سوشل میڈیا پر دھوم مچانے والے ’ارشد چائے والا‘ کے نام سے مشہور نوجوان نے اسلام آباد میں اپنا کیفے بنا لیا۔ ارشد نے شوبز کی دنیا میں قدم رکھا  پھر اچانک  غائب ہوگیا تھا۔اب ارشد خان نے اسلام آباد میں اپنا کیفے بنا لیا ہے جس کا نام انہوں نے کیفے چائے والا رکھا ہے۔ ان کا کیفے 10 اکتوبر سے اسلام آباد کے ڈی چوک پر بلند مرکز کی جانب کھل رہا ہے۔ کیفے چائے والا، روف ٹاپ کیفے لانچ کی تیاریاں جاری ہیں۔ ارشد خان نے اپنے حالیہ انٹرویو میں بتایا مجھے بہت خوشی ہو رہی ہے کہ میں نے اپنا ایک کیفے قائم کیا ہے۔ میرا ارادہ ہے کہ میں اس کیفے کی چینز یا برانچز پورے پاکستان میں کھولوں۔ ارشد خان کے ماڈرن طرز کے کیفے کی تھیم ’ٹرک آرٹ‘ پر مبنی ہے اور کیفے میں شوخ رنگوں کا انتخاب کیا گیا ہے جبکہ کیفے کے انٹیرئیر ڈیزائن میں پاکستانی ثقافت صاف نمایاں ہے۔