پاک بحریہ گوادر پورٹ اور سی پیک کی سکیورٹی میں اہم کردار ادا کر رہی: صدر
اسلام آباد (وقائع نگار خصوصی) صدرڈاکٹر عارف علوی نے نئے نیول چیف کو عہدے سنبھالنے پر مبارکباد دیتے ہوئے نیک خواہشات کا اظہار کیا۔ تفصیلات کے مطابق صدر عارف علوی سے چیف آف نیول سٹاف ایڈمرل محمد امجد خان کی ملاقات ہوئی جس میں صدر ڈاکٹر عارف علوی نے نیول چیف کو عہدہ سنبھالنے پر مبارکباد دی۔ صدر عارف علوی نے کہا کہ پاکستان کی بحری حدود کے دفاع میں پاکستان نیوی کا کلیدی کردار ہے۔ جبکہ پاک نیوی گوادر پورٹ اور سی پیک سکیورٹی میں اہم کردار ادا کر رہی ہے۔ ڈاکٹر عارف علوی نے چیف آف نیول سٹاف کیلئے نیک خواہشات کا اظہار کرتے ہوئے کہا نیوی ایڈمرل امجد خان نیازی کی قیادت میں سمندری چیلنجز پر قابو پائے گی۔
