لاہور(سپورٹس رپورٹر+نمائندہ سپورٹس )پاکستان پروفیشنل باکسنگ لیگ نے پاکستان میں پروفیشنل باکسنگ کے حوالے سے بڑا فیصلہ کرتے ہوئے پہلی مرتبہ پرو بیلٹ متعارف کروا دیا۔ اسلام آباد میں تقریب کے دوران ‘پاکستان پروفیشنل لیگ’ کے نام سے بیلٹ متعارف کروائی گئی جس کو پاکستان کے قومی جانور مارخور کے چہرے کی گولڈن کلر تصویر اور پی پی بی ایل کے بورڈ ارکان کی تصاویر سے سجایا گیا ہے۔پی پی بی ایل کے چیئرمین جنرل (ر) احسان الحق کا کہنا تھا کہ ‘پاکستان میں پروفیشنل باکسنگ کے امکانات بڑے روشن ہیں، یقین ہے یہ بیلٹ ملک میں انعامی مقابلوں کیلئے اہم سنگ میل ہوگی۔جلد   پاکستان میں تین کیٹگریز میں سپر باکسنگ ٹائٹل کے مقابلے کروائے جائیں گے، جس میں ملک بھر سے اور باہر سے بھی باکسرز کو شامل کیا جائیگا۔پی پی بی ایل کے صدر سید نعمان شاہ کا کہنا تھا کہ پی پی بی ایل ورلڈ باکسنگ کونسل اور پاکستان باکسنگ فیڈریشن کو بیلٹ کی توثیق کیلئے خطوط لکھے گی۔ بیلٹ کے افتتاح سے ملک میں باکسرز کے درمیان مقابلے کی فضا قائم ہوگی۔ یہ بیلٹ قومی باکسرز کو پروفیشنل سطح پر آزمائش کا موقع فراہم کریگی اور انہیں پروموٹرز سے لین دین کا بھی موقع ملے گا۔ اس بیلٹ کے تحت ہم بین الاقوامی باکسرز کو نمائشی میچوں کیلئے پاکستان لائیں گے۔ پاکستان میں کئی باصلاحیت باکسرز ہیں اور اگر انہیں صحیح پلیٹ فارم مل گیا تو حقیقی چمپیئنز بن سکتے ہیں۔مجھے یقین ہے کہ اس بیلٹ سے ہمارے نوجوانوں پر واضح اثر پڑے گا، انہیں پروفیشنل بننے اور ٹائٹلز جیت کر سٹار بننے کیلئے راستہ ہموار کرے گی۔