پاک فوج کی ہیٹ ٹرک‘برطانیہ میں عالمی پیس اسٹکنگ مقابلہ جیت لیا
لاہور+اسلام آباد (سپورٹس رپورٹر+سٹاف رپورٹر) پاکستان آرمی نے ایک اور عالمی فوجی مقابلہ جیت لیا۔ تفصیلات کے مطابق پاکستان آرمی نے مسلسل تیسری بار برطانیہ میں ہونے والا عالمی فوجی مقابلہ جیت کر دنیا بھر میں اپنا سکہ منوا لیا ہے۔ پاک فوج کے شعبہ تعلقات عامہ آئی ایس پی آر کے مطابق پاکستان آرمی کی ٹیم نے برطانیہ کی رائل ملٹری اکیڈمی سینڈ ہرسٹ میں ہونے والا عالمی پیس اسٹکنگ مقابلہ اپنے نام کیا۔ پاکستان ملٹری اکیڈمی کی ٹیم نے ایونٹ میں پاکستان آرمی کی نمائندگی کی۔ گذشتہ سال پاکستان آرمی نے برطانیہ کی رائل ملٹری اکیڈمی سینڈ ہرسٹ میں ہونے والے پیس سٹکنگ مقابلے کے نام سے معروف بین الاقوامی فوجی مشقوں کا مقابلہ جیتا تھا۔ آرمی کی ٹیم مسلسل دو برس سے یہ مقابلہ جیت رہی ہے۔
