لاہور(سپورٹس رپورٹر+نمائندہ سپورٹس) پاکستان کرکٹ بورڈ نے محدود اوورز کی کرکٹ کیلئے قومی ٹیم کے کپتان بابر اعظم کو ٹی ٹونٹی ورؒلڈ کپ تک کپتان برقرار رکھنے کا فیصلہ کیا ہے۔پاکستان کرکٹ بورڈ نے رواں برس مئی میں بابر اعظم کو ایک برس کیلئے قومی ٹی ٹونٹی ٹیم کا کپتان مقرر کیا تھا اور پھر نومبر میں شیڈول ٹی ٹونٹی ورلڈ کپ اور دیگر ٹیموں کے خلاف شیڈول سیریز میں ان کی کارکردگی کا جائزہ لینے کے بعد انہیں کپتان برقرار رکھنے یا نہ رکھنے کا فیصلہ کرنا تھا۔عالمی وبا کرونا کے باعث اب نومبر میں آسٹریلیا میں شیڈول ٹی ٹونٹی ورلڈ کپ ملتوی ہو چکا ہے۔ 2021 میں ہونے والا ٹی ٹونٹی ورلڈ کپ بھارت میں شیڈول ہے تاہم ابھی تک آئی سی سی کی جانب سے 22-2021 میں ہونے والے ٹی ٹونٹی ورلڈ کپ کے میزبان کا اعلان نہیں کیا گیا۔ذرائع کا بتانا ہے چونکہ ٹی ٹونٹی ورلڈ کپ کی تاریخ آگے چلی گئی ہے لہذا پی سی بی نے بابر اعظم کے عہدے کی معیاد میں بھی ورلڈ کپ تک توسیع کرنے کا فیصلہ کیا ہے۔بابر اعظم ون ڈے کے بھی کپتان ہیں اور وہ پہلی مرتبہ زمبابوے کے خلاف سیریز میں قومی ٹیم کی کپتانی کریں گے۔