لاہور( نوائے وقت رپورٹ) مسلم لیگ  (ن)کی ترجمان مریم اورنگزیب نے وزیراعظم عمران خان کو مخاطب کرتے ہوئے کہا کہ ابھی تو پی ڈی ایم کا دوسرا جلسہ ہے، آپ نے گھبرانا نہیں ہے۔ لاہور میں میڈیا سے بات کرتے ہوئے ترجمان (ن) لیگ مریم اورنگزیب کا کہنا تھا کہ پی ڈی ایم کے ایک جلسے نے عمران اور کرائے کے ترجمانوں کو پاگل کردیا ہے۔ دو بچوں نے ’’انکل‘‘ اور ان کی کرائے کی ٹیم کی دوڑیں لگوا دی ہیں۔ مریم اورنگزیب کا کہنا تھا کہ عمران خان نے کراچی کی ریلی دیکھ کر اپنی اگلی تقریر لکھنی شروع کردی ہے۔ اللہ تعالٰی سے دعا ہے کہ وہ انہیں ظرف اور صبر دے۔  عوام نے آپ کا استعفیٰ لکھ دیا ہے۔ ووٹ چوری کر کے مسلط ہوں تو عوام کا رد عمل اسی طرح دیکھا جاتا ہے مہنگائی اورغربت کا توڑ ملک میں نئے شفاف اور غیر جانبدارانہ انتخابات کا انعقاد ہے۔