ساہیوال، چیچہ وطنی، کسووال (نامہ نگاران + نمائندہ نوائے وقت) موٹر سائیکل کو ٹکر کے بعد تیز رفتار کار بے قابو ہو کر درخت سے ٹکرا گئی جس کے نتیجہ میں 4 افراد موقع پر ہی جاں بحق جبکہ تین افراد شدید زخمی ہو گئے۔ تھانہ تلمبہ کی پولیس زیرحراست ملزموں کے ہمراہ پرائیویٹ کار پر چیچہ وطنی سے ککھاں والی روڈ پر جا رہی تھی۔ تیز رفتاری کی وجہ سے چک 108/7-R کے قریب موٹر سائیکل سے ٹکرانے کے بعد بے قابو ہو کر درخت سے جا ٹکرائی جس کے نتیجہ میں گلشیرولد خا ن محمد، امجد حسین ولد اللہ بخش، محمد آصف ولد لیاقت علی اور محمد اسلم ولد بشیر احمد موقع پر ہی جاں بحق ہو گئے جبکہ محمود الحسن، افضل اور سیف الرحمن شدید زخمی ہو گئے۔ جنہیں ریسکیو 1122 نے تحصیل ہیڈ کوارٹر چیچہ وطنی پہنچایا۔ساہیوال سے نمائندہ نوائے وقت کے مطابق حادثہ ہڑپہ چاندنی چوک روڈ چک108۔سیون۔آر کے قریب پیش آیا۔ پولیس مفرور ملزم امجد حسین کو گرفتار کر کے واپس جا رہی تھی۔  دو موٹر سائیکل سوار محمد اسلم اور سیف علی ہلاک ہو گئے جبکہ کار ڈرائیور محمد آصف اور زیر حراست ملزم امجد حسین بھی ہلاک ہو گیا۔ جبکہ تین پولیس ملاز م محمد افضل، محمود الحسن اور گل شیر شدید زخمی ہو گئے۔2 زخمیوں کی تشویشناک بتائی جا رہی ہے۔