قصور/ سرگودھا/ چونیاں (نمائندہ نوائے وقت/ نامہ نگار) قصور میں کھڑی ٹرالی سے موٹرسائیکل ٹکرانے سے دو موٹرسائیکل سوار جاں بق جبکہ سرگودھا میں مختلف حادثات میں دو خواتیں سمیت تین افراد جاں بحق اور خواتین و بچوں سمیت 30 زخمی ہو گئے۔ چونیاں میں دو بچیاں جاں بحق ہوئیں۔ تفصیلات کے مطابق قصور کے علاقہ گوہڑ جاگیر کا رہائشی محمد یعقوب مہالم خورد کے رہائشی اعتزاز احسن اور ابوبکر ایک ہی موٹرسائیکل پر آ رہے تھے کہ جب وہ نواحی علاقہ چک 18 کے قریب پہنچے تو سڑک کنارے کھڑی ٹرالی سے ٹکرا گئے جس کے نتیجہ میں محمد یعقوب اور اعتزاز احسن موقع پر ہی جاں بحق ہو گئے جبکہ ابوبکر زخمی ہو گیا۔ سرگودھا میں مختلف ٹریفک حادثات میں دو خواتین سمیت تین افراد جاں بحق اور خواتین و بچوں سمیت 30  افراد زخمی ہو گئے۔ مڈھ رانجھا کے علاقہ غوث محمد والا کے قریب تیز رفتار گاڑی کی ٹکر سے خاتون سمیت دو افراد مہوش بی بی اور صفدر جاں بحق ہو گئے جبکہ سرگودھا لاہور روڈ پر موٹرے وے سیال موڑ انٹر چینج کے قریب تیز رفتار ڈمپر نے مسافر بس کو ٹکر مار دی جس کے نتیجہ میں بس ہوسٹس موقع پر جاں بحق اور دو افراد شدید زخمی ہوئے۔ کٹھہ سگھرال روڈ پر مسافر کوسٹر چھبیل نہر میں کوٹر بے قابو ہوکر نالہ میں جا گری جس کے نتیجہ میں خواتین اور بچوں سمیت 30   مسافر شدید زخمی ہو گئے جن کو ڈی ایچ کیو ہسپتال منتقل کر دیا گیا جہاں 20   کو فوری طبی امداد دیکر چھ کو داخل اور چار افراد کو تشویشناک حالت میں ریفر کر دیا گیا۔ چونیاں میں تھانہ کنگن پور کی حدود  شام کوٹ نو میں موٹرسائیکل رکشہ اور ٹریکٹر میں خوفناک تصادم میں دو بچیاں جاں بحق ہو گئی۔ علاقہ کنگن پور میں تصادم تیز رفتاری کی وجہ سے پیش آیا ہے۔ ٹریکٹر ڈرائیور موقع پر سے فرار ہو گیا۔ ایک بچی کی عمر 4 سال دوسری بچی کی عمر دو سال ہے۔ حادثہ میں جاں بحق ہونے والے خاندان کا تعلق پتوکی انور کالونی سے ہے۔