موڑکھنڈا/ننکانہ صاحب (نامہ نگار) دو مختلف  پولیس مقابلوں کے دوران دو ڈاکو ہلاک، تین فرار ہوگئے۔ تھانہ صدر ننکانہ کے گائوں چک نمبر10گ ب کے رہائشی گلزار سے 2 نامعلوم موٹر سائیکل سوار ڈاکو گن پوائنٹ پر نقدی اور موبائل چھین کر فرار ہو گئے۔ گلزار کے واویلا کرنے پر اہل علاقہ نے گلزار کے ہمراہ ڈاکووں کا پیچھا کیا جس پر دونوں ڈاکو 10چک پل کے قریب کماد کی فصل میں چھپ گئے۔ وقوعہ کی اطلاع ملتے ہی ایس ایچ او تھانہ صدر ننکانہ محمد ادریس اور انچارج چوکی 5 چک ہمراہی جوانوں کے ساتھ موقع پر پہنچے۔ ڈاکووں نے پولیس پارٹی کو دیکھتے ہی فائرنگ شروع کر دی جس کے نتیجہ میں پولیس نے خود کو بچانے کے لیے جوابی فائرنگ کی اور گرفتاری دینے کا مطالبہ کیا۔ پولیس ذرائع کے مطابق مبینہ طورپر ایک ڈاکو اپنے ہی ساتھی کی فائرنگ سے ہلاک اور دوسرا فرار ہو گیا۔ پولیس نامعلوم ڈاکو کی نعش اور موٹر سائیکل قبضہ میں لیکر مقدمہ درج کرلیا۔ علاوہ ازیں موڑ کھنڈا بائی پاس پرچدھڑ چوک کے قریب ڈکیتی کی اطلاع ملنے پر ایس ایچ او تھانہ مانگٹانوالہ علی حسنین اور چوکی انچارج موڑ کھنڈا وقاص انور موقع پر پہنچے، پولیس پارٹی کو دیکھتے ہی ڈاکووں نے فائرنگ شروع کر دی، فائرنگ کے نتیجہ میں ایک ڈاکو شدید زخمی ہوگیا جبکہ دیگر دو ڈاکوئوں موقع سے فرار ہونے میں کامیاب ہوگئے۔ پولیس نے زخمی ڈاکو کو گرفتار کرکے اسے ڈسٹرکٹ ہیڈ کوارٹر ہسپتال ننکانہ صاحب لارہے تھے مگر وہ راستہ میں ہی پیپلاں والا کے قریب زندگی کی بازی ہار گیا۔