اسلام آباد (وقائع نگار خصوصی) وزیر اعظم  عمران خان آج (جمعہ) حسن ابدال  میں نو تعمیر شدہ ریلوے سٹیشن کا افتتاح کریں گے۔ جمعرات کے روز ڈی سی اٹک، ڈی پی او اٹک، اسسٹنٹ کمشنر حسن ابدال، پارٹی عہدیداروں اور سکیورٹی  اداروں کے اہلکار وں نے ریلوے سٹیشن حسن ابدال کا دورہ کیا اور سکیورٹی اور دیگر انتظامات کا جائزہ لیا۔ وزیر اعظم عمران خان کل (ہفتہ) حافظ آباد  کا دورہ کرینگے، جہاں وہ یونیورسٹی آف حافظ آباد کا سنگ بنیاد اور دیگر ترقیاتی منصوبوں کا اعلان کرینگے۔ وزیر اعلیٰ پنجاب کے ڈپٹی سیکرٹری نے بھی گذشتہ روز حافظ آباد کا دورہ کیا۔ وزیراعظم عمران خان آج (جمعہ)  سوات کے گراسی گرائونڈ میں جلسے سے خطاب کریں گے۔ عمران خان کے دورے کے دوران سوات سمیت ملاکنڈ ڈویژن کیلئے بڑا پیکیج متوقع ہے۔ مینگورہ میں وزیر اعظم عمران خان کے دورے کیلئے تیاریاں جاری ہے۔ وزیراعظم آج جمعہ کو گراسی گرائونڈ میں جلسے سے خطاب کریں گے اور ملاکنڈ ڈویژن کیلئے صحت کارڈ کا بھی افتتاح کریں گے۔ جلسے سے وفاقی وزیر مراد سعید، وزیراعلی محمود خان بھی خطاب کریں گے۔