سرگودھا (نامہ نگار) فیصل آباد روڈ میڈیکل کالج کے قریب تیز رفتار ڈمپرز نے مسافر ویگن کو کچل دیا جس میں تین خواتین سمیت چار افراد جاں بحق اور خواتین سمیت تیرہ مسافر شدید زخمی ہوگئے۔ جن کو ڈی ایچ کیو ہسپتال منتقل کر کے پولیس مصروف تفتیش ہے۔ تین زخمیوں کو تشویشناک حالت کے باعث لاہور ریفر کر دیا گیا جبکہ وزیراعلی پنجاب نے واقعہ کا نوٹس لیتے ہوئے رپورٹ طلب کر کے گہرے رنج وغم کا اظہار کیا اور محکمہ صحت کو زخمیوں کی بہتر طبی سہولیات کی فراہمی کا حکم دیدیا۔ سرگودھا فیصل آباد روڈ پر میڈیکل کالج کے قریب چنیوٹ سے سرگودھا آنے والی مسافر ویگن کو سامنے سے مقابلہ بازی سے جانے والے تیز رفتار ڈمپرز نے کچل دیا جس میں مسافر ویگن کے پرخچے اڑ گئے اور اس میں سوار تین خواتین فاضل ٹائون سرگودھا کی منیراں بی بی عرف کاکو جبکہ کوثر پروین اور کوٹلہ جہانگیر کا مسافر نذیر سلطان اور جوہرآباد کی خاتون شاہدہ پروین زوجہ اقبال احمد موقع پرجاںبحق اور تیرہ مسافر شدید زخمی ہو گئے جن کو ڈسٹرکٹ  ریسکیو آفیسر مظہر شاہ کی سربراہی میں ریسکیو ٹیم نے  ڈی ایچ کیو ٹیچنگ ہسپتال منتقل کر دیا گیا جہاں تین کو تشویشناک حالت میں لاہور ریفر کر دیا گیا جبکہ پولیس جائے وقوعہ پر پہنچ کر مصروف تفتیش ہے۔