نیشنل انڈر19تھری ڈے ٹورنامنٹ کے میچز لاہور سے راولپنڈی اور اسلام آباد منتقل
لاہور (سپورٹس رپورٹر) لاہور میں خراب موسم کے باعث نیشنل انڈر19 تھری ڈے ٹورنامنٹ کے میچز راولپنڈی اور اسلام آباد منتقل کردئیے گئے ہیں۔ لہٰذا فائنل سے قبل ایونٹ کے آخری دونوں راؤنڈز کے میچز راولپنڈی اور اسلام آباد میں کھیلے جائیں گے۔ ایونٹ کے فائنل کے وینیو کا فیصلہ بعد میں کیا جائے گا۔ سندھ اور سدرن پنجاب کے مابین ایونٹ کے تیسرے راؤنڈ کا مریدکے کنٹری کلب میں شیڈول تین روزہ میچ اپنے مقررہ وقت اور مقام پر ہی کھیلا جائے گا۔ اس راؤنڈ کے ابتدائی طور پر13 نومبر کو لاہور میں شیڈول میچز اب 14 نومبر کو راولپنڈی اور اسلام آباد میں کھیلے جائیں گے۔
