جنرل ندیم رضا سے قطری ائر چیف کی ملاقات، دفائی تعاون بڑھانے پر غور
اسلام آباد ( نیوز رپورٹر،سٹاف رپورٹر) آئی ایس پی آر کے مطابق چیئرمین جوائنٹ چیفس آف سٹاف کمیٹی جنرل ندیم رضا سے قطری فضائیہ کے سربراہ نے ملاقات کی جس میں پیشہ ورانہ اور باہمی دلچسپی کے امور اور سکیورٹی صورتحال پر تبادلہ خیال کیا گیا۔ سکیورٹی اور دفاعی تعاون بڑھانے پر بھی غور کیا گیا۔ میجر جنرل سالم نے پاک افواج کی پیشہ ورانہ صلاحیتوں کی تعریف کی اور دہشت گردی کیخلاف جنگ میں پاکستان کے کردار کو سراہا۔ دریں اثناء قطر کی فضائیہ کے سربراہ سٹاف میجر جنرل (پائلٹ) سالم حماد عقیل النابت نے اپنے وفد کے ہمراہ گزشتہ روز ائیر ہیڈ کوارٹرز اسلام آباد کا دورہ کیا۔ ان کی آمد پر پاک فضائیہ کے سربراہ ائیر چیف مارشل مجاہد انور خان نے معزز مہمان کا استقبال کیا۔ پاک فضائیہ کے ایک چاق وچوبند دستے نے انہیں سلامی پیش کی۔ معزز مہمان نے پاک فضائیہ کے شہداء کو خراجِ عقیدت پیش کرنے کے لئے یاد گارِ شہداء پر پھولوں کی چادر چڑھائی۔ بعد ازاں کمانڈر قطر امیری فضائیہ نے پاک فضائیہ کے سربراہ سے تفصیلی ملاقات کی۔ دونوں فضائی سربراہان نے باہمی دلچسپی کے امور پر تبادلہ خیال کیا۔ کمانڈر قطر امیری فضائیہ نے پاک فضائیہ کی پیشہ ورانہ مہارت کو سراہا اور خود انحصاری کے میدان میں پاک فضائیہ کی غیر معمولی ترقی کی تعریف کی۔ پاک فضائیہ کے سربراہ نے پاکستان اور قطرکے درمیان برادرانہ تعلقات اور باہمی تعاون پر گفتگو کی۔ دونوں معزز شخصیات نے فضائی افواج کے درمیان بے مثال دوستانہ تعلقات کو نئی جہتوں سے روشناس کرانے کے عزم کا اعادہ کیا۔
