جیت کے میدان میں اتریں گے: سہیل اختر، مداحوں کو مایوس نہیں کرینگے: عماد وسیم
لاہور(سپورٹس رپورٹر+نمائندہ سپورٹس) قلندرز کے کپتان سہیل اختر کا کہنا ہے کہ ٹی ٹوئنٹی کرکٹ میں ایک دوپلیئرز کا پرفارم کرنا بھی کافی ہوتا ہے، ہمارے ہر کھلاڑی نے پرفارم کیا ہے جس کی وجہ سے فائنل تک پہنچے فائنل میں جیت کیلئے میدان میں اتریں گے۔لاہورقلندرز کے کپتان سہیل اختر نے ورچوئل پریس کانفرنس میں اظہار خیال کرتے ہوئے کہا کہ لاہورقلندرز نے گزشتہ پانچ سال کے دوران ٹیلنٹ ہنٹ کیلئے بہت کام کیا اور یہ اسی چیز کا نتیجہ ہے کہ لاہور قلندرز آج پی ایس ایل کے فائنل میں ہے، ٹی ٹوئنٹی کرکٹ میں ایک دوپلیئرز کا پرفارم کرنا بھی کافی ہوتا ہے، ہمارے ہر کھلاڑی نے پرفارم کیا ہے جس کی وجہ سے فائنل تک پہنچے۔سہیل اختر کا کہنا تھا کہ پی سی بی نے دوٹرافیز رکھی ہیں، ایک ونر کو ملے گی اورایک رنراپ ٹیم کو دی جائے گی، جس کے نصیب میں جو ٹرافی ہوگی اسے مل جائے گی، جو بھی ٹرافی اٹھائے خوشی اس بات کی ہے کہ ٹورنامنٹ خیریت سے ہوگیا، لاہورقلندرز کو پورے پاکستان سے سپورٹ مل رہی ہے، فائنل میں پہنچنے والی دونوں ٹیمیں متوازن ہیں۔کراچی کنگز کے کپتان عماد وسیم کا کہنا ہے کہ پی ایس ایل فائیو کے فائنل میں لاہور قلندرز سے جیتنے کے لیے میدان میں اتریں گے اور خود کو ہرگز فاتح تصور نہیں کر رہے،جو ٹیم اچھا کھیلی وہ جیت جائے گی۔پاکستان سپر لیگ فائیو کے فائنل سے قبل ورچوئل میڈیا کانفرنس سے خطاب کرتے ہوئے کراچی کنگز کے کپتان عماد وسیم نے کہا کہ کھیل میں مقابلے کا رجحان ہونا چاہیے لیکن میچ میں تناؤ اور تیزی سے اجتناب برتنا ہوگا، امید ہے کہ ٹائٹل کے مقابلے کے دوران کوئی لڑائی جھگڑا نہیں ہوگا، جو بھی ٹیم جیتے یا ہارے ہم اچھی کرکٹ کھیلیں گے، کوالیفائر میچ میں ملتان سلطان کے خلاف غلطیاں کیں، میچ کو سپر اوور تک نہیں جانا چاہیے تھا، اپنے مداحوں کو ہرگز مایوس نہیں کریں گے۔عماد وسیم نے کہا کہ لاہور قلندر کے تمام کھلاڑیوں کو خطرناک تصور کرتے ہیں، کسی ایک کھلاڑی کو آسان نہیں لیں گے،ہر کھلاڑی کے خلاف گیم پلان تیار کریں گے، بطور کپتان اور کھلاڑی اپنی ذمہ داری ادا کرنے کی کوشش کرتا ہوں،ہمیشہ بے غرض ہو کر کھیلتا ہوں، لاہور قلندرز کا اعتماد بڑھا ہوا ہے لیکن فائنل مختلف ہوگا، دونوں ٹیموں کا کوئی بھی کھلاڑی کھیل کا پانسہ تبدیل کر سکتا ہے، فاسٹ بولر محمد عامر سے بہت زیادہ امیدیں ہیں، انہوں نے ہی سپر اوور میں کامیاب بولنگ کرکے فائنل میں رسائی دلوائی،بابر اعظم اور میں خود بھی ٹیم کے کام آنے کی کوشش کریں گے۔
