سینئر ہاکی چیمپئن شپ:نیشنل بنک واپڈاکی ٹیمیں فائنل میں پہنچ گئیں
لاہور( سپورٹس رپورٹر +نمائندہ سپورٹس ) پاکستان ہاکی فیڈریشن کے زیر اہتمام راولپنڈی میں کھیلی جانیوالی سینئر ہاکی چیمپئن شپ کا فائنل آج سہہ پہر 30-2 بجے واپڈا اور نیشنل بنک آف پاکستان کے مابین کھیلا جائیگا‘مہمان خصوصی وفاقی وزیر برائے سائنس اینڈ ٹیکنالوجی فواد چوہدری ہونگے‘پاکستان ہاکی فیڈریشن کے صدر بریگیڈیئر ر خالد سجاد کھوکھر کی جانب سے فائنل جیتنے والی ٹیم کیلئے 3 لاکھ‘رنر اپ ٹیم کیلئے 2 لاکھ‘تیسرے نمبر پر آنے والی ٹیم کو 1 لاکھ کیش پرائز کا اعلان کیا ہے۔ بیسٹ پلیئر کیلئے 50 ہزار کیش پرائز کا بھی اعلان کیا ہے۔ جمعرات کو چیمپئن شپ کے دونوں سیمی فائنل کھیلے گئے پہلے سیمی فائنل میں نیشنل بنک نے سڈن ڈیتھ پر سوئی سدرن گیس کمپنی کو شکست دی۔ دونوں ٹیموں کے درمیان میچ مقررہ وقت تک برابر رہنے کے بعد پنلٹی شوٹ آوٹ پر بھی برابر رہا تھا۔ دوسرے سیمی فائنل میچ میں واپڈا نے نیوی کو شکست دیکر فائنل میں رسائی حاصل کی۔
