اوکاڑہ (نامہ نگار) چیف جسٹس لاہور ہائی کورٹ محمد قاسم خان نے ضلع اوکاڑہ کا دورہ کیا۔ ڈسٹرکٹ اینڈ سیشن کورٹس کے احاطہ میں کلین اینڈ گرین پاکستان مہم کے تحت ایرو کیریا کا پودا لگایا اور ملکی سلامتی کے لئے دعا کی۔ اس موقع پر رجسٹرار لاہور ہائی کورٹ ملک مشتاق احمد اوجلہ، ڈسٹرکٹ اینڈ سیشن جج وسیم الرحمان خان خاکوانی، سٹاف آفیسر سمیت ایڈیشنل سیشن ججز، سینئر سول ججز اور سول ججز بھی موجود تھے۔ ڈسٹرکٹ اینڈ سیشن جج وسیم الرحمان خان خاکوانی نے ڈسٹرکٹ کورٹس کی جانب سے کی گئی شجرکاری سے متعلق تفصیلی بریفنگ دی۔ بعد ازاں چیف جسٹس محمد قاسم خان  سے ڈسٹرکٹ بار اوکاڑہ، تحصیل دیپالپور اور تحصیل رینالہ خورد کے صدور و جنرل سیکریٹریز نے ملاقات کی اور بار کو درپیش مسائل سے متعلق آگاہ کیا۔ چیف جسٹس لاہور ہائی کورٹ محمد قاسم علی خا ن نے بار ایسوسی ایشن کو درپیش مسائل کے حل کی یقین دہانی کروائی۔ بعد ازاں انہوں نے نئی تعمیر شدہ فیملی کورٹ، ججز کے لئے نئے  بیچلر ہاسٹل اور مسجد کا افتتاح کیا۔ ڈسٹرکٹ اینڈ سیشن جج وسیم الرحمان خان خاکوانی نے چیف جسٹس لاہور ہائی کورٹ محمد قاسم خان کو ضلع میں  نمٹائے گئے کیسز، زیر التوا کیسز کو جلد از جلد نمٹائے  جانے اور فیملی کورٹ میں زیر سماعت مقدمات کو جلد حل کرنے سے متعلق بریفنگ دی۔