کراچی (صباح نیوز)کراچی کے ڈیفنس فیز 4یثرب امام بارگاہ کے قریب مبینہ پولیس مقابلے میں ڈاکو ہلاک ہو گئے۔تفصیلات کے مطابق کراچی کے علاقے ڈیفنس فیز 4 یثرب امام بارگاہ کے قریب مبینہ پولیس مقابلے میں 5 ڈاکو  مارے گئے، ہلاک ہونے والوں کی لاشیں جناح ہسپتال منتقل کردی گئیں۔پولیس حکام کے مطابق 5 ملزمان کراچی کے علاقے ڈیفنس فیز 4 کے ایک بنگلے میں ڈکیتی کی نیت سے داخل ہوئے ۔اسی دوران پولیس کو اطلاع ملی اور وہ موقع پر پہنچ گئی۔ ملزمان نے پولیس کو دیکھتے ہی فائرنگ کردی جب کہ پولیس کی جانب سے جوابی فائرنگ میں پانچوں ملزم ہلاک ہوگئے۔ایس ایس پی سائوتھ زبیر نذیر نے بتایا کہ ہلاک ملزم ڈبل کیبن گاڑی میں آئے تھے۔ ملزموں کے قبضے سے اسلحہ برآمد ہوا ہے جب کہ ابتدائی طور پر ملزمان سرائیکی گینگ کے کارندے معلوم ہوتے ہیں۔ انہوں نے بتایا تفتیش جاری ہے اور ملزمان کا کریمنل ریکارڈ چیک کیا جا رہا ہے۔