رحیم یارخاں (احسان الحق سے ) متحدہ عرب امارات (یو اے ای) کے ولی عہد شیخ محمد بن زید کے آئندہ ہفتے ہونے والے نجی دورہ چولستان کی تیاریوں کے سلسلے میں انکی ایک ایڈوانس پارٹی گزشتہ روز ایک خصوصی طیارے کے ذریعے چولستان پہنچ گئی ۔ ذرائع کے مطابق چاندنہ ایئر پورٹ پر لینڈ کرنے والے خصوصی طیارے کے ذریعے تلور کے شکار کے لئے مخصوص خصوصی گاڑیاں اور رائل گارڈز چولستان پہنچے ہیں جب کہ توقع ہے کہ آئندہ ایک دو روز کے دوران مزید ایڈوانس پارٹیاں بھی چولستان پہنچیں گی ۔یاد رہے کہ یو اے ای کے ولی عہد شیخ محمدبن زید متوقع طور پر اگلے ہفتے کے دوران نجی دورے پر رحیم یارخاں پہنچ رہے ہیں جہاں وہ اپنے قیام کے دوران چولستان میں تلور کے شکار کے علاوہ متوقع طور پر اسلام آباد میں وزیراعظم عمران خان سے بھی ملاقات کرینگے ۔ ذرائع کے مطابق یو اے ای کے شاہی وفد کی چولستان آمد کے سلسلے میں خصوصی حفاظتی انتظامات کئے گئے ہیں اور اطلاعات کے مطابق رینجرز کے خصوصی دستے چولستان میں تعینات کئے گئے ہیں ۔