اسلام آباد (سٹاف رپورٹر) پی اے ایف ائیرمین اکیڈمی کورنگی کریک کے قیام کے بعد پہلے ایرو  اپرنٹس بیج  کی پاسنگ آؤٹ پریڈ ہوئی۔ سربراہ پاک فضائیہ ائیر چیف مارشل مجاہد انور خان اس موقع پر مہمان خصوصی تھے۔ مجموعی طور 1474   ایرو اپرنٹس نے اپنی ٹیکنیکل ٹریننگ کامیابی سے مکمل کی۔ جس میں بنگلہ دیش، سری لنکا، نیپال اور پاکستان نیوی کے زیر تربیت ملازمین  بھی شامل ہیں۔ سربراہ پاک فضائیہ نے تقریب سے خطاب کرتے ہوئے کہا کہ آج کا دن پاک فضائیہ کے نیکسٹ جنریشن پروگرام کے تحت  تربیت کی نئی جہتوں کے حصول کے لئے اہم سنگ میل کی حیثیت رکھتا ہے۔ انہوں نے مزید کہا کہ یہ اکیڈمی خطے میں اپنی نوعیت کی پہلی اعلیٰ تربیت گاہ ہے جس کا مقصد نہ صرف ماہر ٹیکنیشنز بلکہ اعلیٰ سوچ کے حامل ائیرمین بھی تیار کرنا ہے۔ انہوں نے پاس آؤٹ ہونے والے  زیر تربیت  افراد کو تلقین کی کہ وہ پاک فضائیہ کی ان شاندار روایات کو برقرار رکھیں جن کی وجہ سے پاک فضائیہ ایک موثر اور مضبوط قوت کے طور پر جانی جاتی ہے۔ انہوں نے اس امید کا اظہار کیا کہ یہ اکیڈمی دنیا کے مشہور تربیتی ادارے کے طور پر جانی جائے گی اور خطے میں اپنی طرز کا منفرد تربیتی اداراہ ہو گا۔ علاقائی صورت حال کا ذکر کرتے ہوئے ائیر چیف نے کہا کہ ملک کو اندرونی و بیرونی محاذوں پر درپیش کسی بھی خطرے سے نبرد آزما ہونے کے لیے پاک فضائیہ دیگر مسلح افواج کے ساتھ ہمہ وقت تیار ہے۔ مقبوضہ کشمیر میں جاری بھارتی جارحیت پر ائیر چیف نے کشمیری بہن بھائیوں کو ان کی پر عزم جدوجہد آزادی کے سلسلے میں اخلاقی‘ سیاسی اور سفارتی حمایت جاری رکھنے کا اعادہ کیا۔