لاہور (کامرس رپورٹر) چیئرمین فیصل آباد انڈسٹریل اسٹیٹس ڈویلپمنٹ اینڈ مینجمنٹ کمپنی میاں کاشف اشفاق نے لاہور چیمبر کے صدر میاں طارق مصباح، سینئر نائب صدر ناصر حمید خان اور نائب صدر طاہر منظور چودھری سے ملاقات میں کہا ہے کہ فیڈمک مقامی و غیرملکی سرمایہ کاری کو فروغ دینے کے لیے بہت اہم کردار ادا کررہی ہے، چین، ایشی، یوپ، ترکی اور سعودی عرب کی کمپنیوں کی جانب سے فیصل آباد انڈسٹریل اسٹیٹ میں صنعت سازی سے روزگار کے وسیع مواقع پیدا ہونگے ۔انہوں نے بتایا کہ سی پیک سے منسلک سپیشل اکنامک زون علامہ اقبال انڈسٹریل سٹی میں وسیع پیمانے پر سرمایہ کاری ہوگی۔انہوں نے لاہور چیمبر کے عہدیداروں کو علامہ اقبال انڈسٹریل سٹی میں بننے والے سٹیٹ آف دی آرٹ ہیلتھ سٹی، فرنیچر سٹی ، اپیرل پارک اور ایگرو پارک منصوبوں سے آگاہ کیا۔میاں کاشف اشفاق نے لاہور چیمبر میں فیڈمک کا ڈیسک قائم کرنے کا اعلان کیا تا کہ چیمبر کا دورہ کرنے والے سرمایہ کاروں اور تجارتی وفود کو فیڈمک میں پائے جانے والے سرمایہ کاری کے منصوبوں سے آگاہ کیا جا سکے۔ لاہور چیمبر کے صدر میاں طارق مصباح ، سینئر نائب صدر ناصر حمید خان اور نائب صدر طاہر منظور چودھری نے کہا کہ جلد ہی لاہور چیمبر کا ایک وفد فیڈمک کا دورہ کرے گا۔