لاہور(سپورٹس رپورٹر+نمائندہ سپورٹس ) کراچی کے علاقے لیاری سے تعلق رکھنے والے باکسر نادر بلوچ ڈبلیو بی سی مڈل ایسٹ ٹائٹل جیتنے والے پہلے پاکستانی بن گئے، ان کا عزم ہے کہ وہ پاکستان کیلئے مزید ٹائٹلز حاصل کریں۔باکسر نادر بلوچ نے ڈبلیو بی سی مڈل ایسٹ کا ٹائٹل اپنے نام کرلیا، یہ ان مسلسل چھٹی فائٹ ہے جس میں انہوں نے فتح حاصل کی ہے۔ انہوں نے بتایا کہ انہوں نے افغان کھلاڑی حسن کو شکست دے کر ٹائٹل اپنے نام کیا۔ وہ صرف اپنے جنون کے بل بوتے پر یہاں تک پہنچے ہیں، نہ ان کی باکسرز جیسی مخصوص ڈائٹ ہے اور نہ وسائل۔ اس کے باوجود وہ پاکستان کیلئے مزید ٹائٹلز حاصل کرنے کے خواہشمند ہیں۔ وہ باکسنگ کیلئے سپلی منٹس یا نیوٹریشن لینے کی استطاعت نہیں رکھتے۔وہ لیاری میں باکسنگ کرنے والی بچیوں سے بھی ملتے رہتے ہیں اور ان کا حوصلہ بڑھاتے ہیں، ان کی خواہش ہے کہ وہ ان کی بھی ٹریننگ کریں اور انہیں آگے بڑھائیں۔انہوں نے شکوہ کیا کہ لیاری کے علاقے کو سیاسی طور پر بدنام کیا جاتا ہے، یہاں موجود کھیل کے پوٹینشل کیلئے کچھ نہیں کیا جاتا۔