فیروزوالہ (نامہ نگار)ڈکیتی اور راہزنی کی متعدد وارداتوں میں مزاحمت پر ڈاکوؤں نے فائرنگ کر کے فیروزوالہ بار کے سابق صدر احمد سلطان چیمہ ایڈووکیٹ کو زخمی کر دیا ۔بتایا گیا ہے کہ فیروزوالہ بار کے سابق صدر احمد سلطان چیمہ ایڈووکیٹ کچہری سے گاؤں جارہے تھے جب موٹروے چک 42کے قریب پہنچے تو ڈاکوؤں نے روکنے کی کوشش کی نہ روکنے پر فائرنگ کر دی جس کے نتیجہ میں کار سوار احمد سلطان چیمہ ایڈووکیٹ زخمی ہو گئے ۔ فیروزوالہ پولیس کے مطابق ہمیں احمد سلطان چیمہ ایڈووکیٹ کی طرف سے کارروائی کیلئے کوئی درخواست نہ ملی ہے درخواست ملنے پر کارروائی کرینگے ۔ رانا ٹاون کے قریب ڈاکووں نے موٹرسائیکل سوار زبیر اکبر کو روک کر لوٹ لیا ۔ ڈاکو موٹرسائیکل نقدی چھین کر لے گئے ۔ موٹروے پر ڈاکووں نے چار کاریں روک کر لوٹ لیں ۔ نقدی موبائل فونز اور دیگر سامان لوٹ کر فرا ر ہو گئے ۔ شرقپور روڈ پر ڈاکووں نے ناکہ لگا کرموٹرسائیکل سوار افضل شکور ، عاصم حیات اور دیگر راہگیروں کو روک کرلوٹ لیا ڈاکو نقدی موبائل فونزو دیگر اشیا چھین کر لے گئے ۔ مڑھ بھنگواں میں چوروں نے زمیندار جمیل احمد کے زرعی فارم میں داخل ہو کر لاکھوں روپے مالیت کے مویشی چوری کر کے لے گئے ۔