لاہور (نیٹ نیوز) بھارتی ریاست تامل ناڈو کی پولیس نے آنجہانی اداکارہ چترا کامراج کو خودکشی پر اکسانے کے الزام میں شوہر کو گرفتار کرلیا۔ بھارتی ٹی وی کی معروف اداکارہ و میزبان چترا کامراج چنئی کے مقامی ہوٹل میں 9 دسمبر کو مردہ پائی گئیں تھی اور ان کی موت کو خودکشی قرار دیا گیا تھا۔ اداکارہ کی رواں سال اگست میں ہی بزنس مین ہیمانتھ سے منگنی ہوئی تھی اور دو ماہ قبل ہی دونوں نے شادی بھی رجسٹرڈ کرائی تھی تاہم روایتی طور پرشادی جنوری میں ہونا تھی۔ 9دسمبر کو چنئی کے ہوٹل میں خودکشی کرلی تھی جس کے بعد ان کے گھر والوں نے پولیس سے تحقیقات کا مطالبہ کیاتھا۔ پولیس نے تحقیقات کے بعد ان کے شوہر ہیمانتھ کو گرفتار کرلیا ہے اور ان کے خلاف مقدمہ بھی درج کرلیا گیا ہے۔ تحقیقات کے دوران پولیس نے اداکارہ کے موبائل فون سے شوہر سے متعلق آڈیو پیغامات ریکور کرکے شواہد اکٹھے کیے تاہم ان کے شوہر نے یہ پیغامات ڈیلیٹ کرکے پولیس کو فون دیا تھا۔