خان پور، صادق آباد، ظفر وال، چناب نگر (نمائندگان+ نمائندہ خصوصی+ نامہ نگار) خان پور میں ٹینکر اور موٹر سائیکل میں تصادم ٹینکر میں آگ لگنے سے باپ بیٹی زندہ جل گئے۔ ظفروال میں تیز رفتار گاڑی نے موٹرسائیکل سواروں کو کچل ڈالا۔ تین نوجوان جاں بحق۔ چناب نگر میں بس کی ڈالے کو ٹکر سے 2 افراد جاں بحق اور 8 زخمی ہو گئے۔ تفصیلات کے مطابق قومی شاہراہ فتح پور کمال کے قریب ایل پی جی ٹینکر اور موٹرسائیکل میں تصادم کے بعد ٹینکر میں آگ لگ گئی۔ حادثہ میں باپ، بیٹی زندہ جل گئے۔ حادثہ خان پور فتح پور کمال کے قریب پیش آیا جہاں قومی شاہراہ پر ایل پی جی ٹینکر اور موٹرسائیکل میں تصادم کے بعد ٹائر پھٹنے سے ایل پی جی ٹینکر میں آگ لگ گئی۔ جاں بحق ہونے والے افراد کی شناخت 22 سالہ اختر اور 5 سالہ رمشہ کے نام سے ہوئی ہے جو فتح پور کے رہائشی تھے۔ شکر گڑھ سے نامہ نگار کے مطابق ظفروال درمان روڈ پر چوہالی کے مقام پر تیز رفتار  گاڑی نے موٹر سائیکل سواروں کوکچل ڈالا۔ تینوں نوجوان زخموں کی تاب نہ لاتے ہوئے جاں بحق ہو گئے۔ مرنے والوں کی شناخت سمیع اللہ، ذیشان علی اور اللہ دتہ کے نام سے ہوئی۔ ڈرائیور موقع سے فرار ہو گیا۔ میتیں گاؤں پہنچے پر گاؤں میں کہرام مچ گیا۔ علاقے کی فضا سوگوار رہی۔ چناب نگر سے نمائندہ خصوصی کے مطابق بس کی ڈالے سے ٹکر 2افراد جاں بحق 8 زخمی ہو گئے۔ نواحی علاقہ کے  محمد اقبال اور محمد اسلم ڈالے پر سامان لوڈ کر چنیو ٹ کی جانب جارہے تھے کہ راستے میں چنیوٹ روڈ پردرہٹہ سٹاپ کے قریب رکشہ کو کراس کرتے ہوئے سامنے سے آنے والی تیز رفتار مسافر بس ڈالے سے ٹکرا گئی جس کے باعث حادثے میں ڈالے میں سوار محمد اقبال اور محمد اسلم جاں بحق ہو گئے جبکہ بس میں سوار 8مسافر معمولی زخمی ہو گئے۔