لاہور(سپورٹس رپورٹر+نمائندہ سپورٹس )پاکستان کے بائیں ہاتھ سے بیٹنگ کرنے والے مڈل آرڈر بیٹسمین فوادعالم نے نیوزی لینڈ کے خلاف ماونٹ منگنوئی ٹیسٹ کی چوتھی اننگز میں 11 سال بعد کیرئیر کی ریکارڈ ساز دوسری سنچری بنائی۔ وہ میچ کی چوتھی اننگزمیں سنچری کرنے والے پہلے پاکستانی بیٹسمین بن گئے ہیں۔انہوں نے 11 سال 5 ماہ بعد کیرئیر کی دوسری سنچری بنائی ، اس سے قبل 2009 ء جولائی میں ڈیبیو ٹیسٹ میں سنچری سکور کی تھی۔فواد عالم کی یہ ریکارڈ سازسنچری منفرد اس لیے بھی ہے کہ انہوں نے وکٹ پر 360 سے زائد منٹس قیام کیا جس کے بعد وہ صدی میں ایشیا سے باہر چوتھی اننگز میں سب سے زیادہ وقت وکٹ پر رہنے والے پاکستانی بن گئے ہیں۔فواد عالم سے قبل اسد شفیق نے برسبین میں 2016 ء میں چوتھی اننگز میں 336 منٹ بیٹنگ کی تھی۔