لاہور (نامہ نگار) پیپلز پارٹی کے بانی چیئرمین ذوالفقار علی بھٹو شہید کی سالگرہ کے موقع پر خصوصی تقریب کا اہتمام پیپلز پارٹی لاہور کے سینئر نائب صدر محمد اشرف بھٹی کے ڈیرے خدا بخش کالونی بھٹہ چوک پر کیا گیا۔ سالگرہ کی تقریب کے مہمان خصوصی پیپلز پارٹی لاہور کے صدر حاجی عزیز الرحمن چن تھے۔ پیپلز پارٹی لاہور کے سیکرٹری جنرل اسرار بٹ‘ سہیل ملک‘ ثمینہ خالد گھرکی‘ سونیا خاں‘ زاہد ذولفقار‘ سمیت دیگر بھی موجود تھے۔ اس موقع پر پیپلز پارٹی لاہور کے صدر حاجی عزیز الرحمن چن اور سنیئر نائب صدر محمد اشرف بھٹی نے تقریب سے خطاب کرتے ہوئے کہا کہ پیپلز پارٹی کے جیالے ذوالفقار علی بھٹو کی سالگرہ جوش و خروش سے منا رہے ہیں۔ شہید ذوالفقار علی بھٹو نے عوام کے حقوق کی جنگ لڑی۔ جو تبدیلیاں عوام کی زندگی میں شہید ذوالفقار علی بھٹو لیکر آئے وہ موجودہ جھوٹی تبدیلی سرکار سوچ بھی نہیں سکتی۔ پاکستان میں حقیقی جمہوریت پیپلز پارٹی کی مرہون منت ہے۔ دوسری جانب پیپلز پارٹی کی خاتون رہنما عطیہ سلیم نے بانی چیئرمین شہید ذوالفقار علی بھٹو کی سالگرہ کی تقریب کا اہتمام کیا۔ تقریب ریلوے کیرن ہسپتال کے ساتھ واقع بلڈنگ میں منعقد کی گئی۔ جس کی مہمان خصوصی پیپلز پارٹی شعبہ خواتین پنجاب کی صدر ثمینہ خالد گھرکی تھیں جبکہ تقریب میں لاہو ر پارٹی کے صدر حاجی عزیز الرحمن چن نے بھی خصوصی شرکت کی۔ اس تقریب سے خطاب کرتے ہوئے ثمینہ خالد گھرکی کا کہنا تھا کہ پارٹی کی مضبوطی کے لئے خواتین کی جدوجہد بھی قابل ستائش ہیں۔ تقریب میں خواتین جیالیوں کی جانب سے جئے بھٹو کے نعرے بھی لگائے گئے اور اس موقع پر پیپلز پارٹی کے بانی اور شہدا کے لیے خصوصی فاتحہ خوانی بھی کی گئی۔