کراچی(صباح نیوز)انڈونیشیا کے قونصل جنرل کراچی میں انتقال کر گئے، سفارت خانے نے بھی تصدیق کر دی۔تفصیلات کے مطابق قونصل جنرل توتوک پریانامتو گزشتہ روز کراچی کے ایک نجی اسپتال میں انتقال کر گئے، توتوک عارضہ قلب میں مبتلا تھے۔سفارتی ذرائع کا کہنا ہے کہ قونصل جنرل کراچی کے نجی اسپتال میں زیر علاج تھے، انھیں ایک ہفتہ قبل سینے میں تکلیف پر ہسپتال لایا گیا تھا۔انڈونیشیا کے قونصل جنرل 3 سال سے کراچی میں تعینات تھے، ان کی میت سرد خانے منتقل کر دی گئی ہے، سفارتی ذرائع کا کہنا ہے کہ این او سی ملنے پر قونصل جنرل کی میت انڈونیشیا لے جائی جائے گی۔پاکستان نے کراچی میں تعینات انڈونیشیا کے قونصل جنرل کی وفات پر تعزیت کا اظہار کیا ہے۔ دفتر خارجہ کے ایک بیان میں کہا گیا ہے کہ ہمیں کراچی میں تعینات انڈونیشیاکے قونصل جنرل توتوک پریانامتو کی حرکت قلب بند ہوجانے سے وفات پر بے حد دکھ ہوا ہے۔