ائر چیف مجاہد انور کی آذربائیجان ائر فورس کمانڈر سے ملا قات‘ پیشہ ورانہ امور پر تبادلہ خیال
اسلام آباد(سٹاف رپورٹر) سربراہ پاک فضائیہ ایئر چیف مارشل مجاہد انور خان نے گزشتہ روز کمانڈر آذربایئجان ایئر فورس لیفٹیننٹ جنرل رمیز طاہروف سے ملاقات کی۔ ملاقات میں پیشہ ورانہ امور اور باہمی تعاون پر تبادلہ ء خیال کیا گیا۔ سربراہ پاک فضائیہ نے آذربائیجانی فضائیہ کی پیشہ ورانہ مہارت کو سراہا اور پاک فضائیہ کی جانب سے عسکری تربیت میں بھرپور مدد اور تعاون کی یقین دہانی کرائی۔ آذربائیجانی فضائیہ کے کمانڈر نے پاک فضائیہ کے اعلیٰ پائیکے تربیتی نظام کی تعریف کی اورآذربائیجانی فضائیہ کے اہلکاروں کی عسکری تربیت میں پاک فضائیہ کے کردار کو سراہا۔ انہوں نے پاک فضائیہ کے خود انحصاری کے اقدامات بالخصوص جے ایف-17 تھنڈر پروگرام کی ملکی سطح پر تیاری کی بھی بھرپور پزیرائی کی۔ بعد ازاں ایئرچیف نے آذربائیجان کے وزیر دفاع کرنل جنرل ذاکر حسنوف سے ملاقات کی-دونوں سربراہان نے باہمی دلچسی کے امور پر تبادلہ خیال کیا اور باہمی تعاون کو مزید فروغ دینے کا اعادہ کیا۔ قبل ازیں ایئر چیف نے یادگار شہدا کا دورہ بھی کیا اور شہدائ کو خراجِ عقیدت پیش کرنے کے لئے یادگارِ پر پھولوں کی چادر چڑھائی۔
