اوکاڑہ‘ سرگودھا (نامہ نگاران) اوکاڑہ میں نیشنل ہائی وے پر ٹرالر کی موٹرسائیکل کو ٹکر‘ ماں بیٹا جاں بحق ایک زخمی، سرگودھا میں دو ٹریفک حادثات میں مزدور سمیت دو افراد جاں بحق اور سات زخمی ہو گئے۔ تفصیلات کے مطابق اوکاڑہ سے نامہ نگار کے مطابق کوٹ رادھاکشن کی رسولاں بی بی تین سالہ بیٹے اور اپنے عزیز کے ہمراہ موٹرسائیکل پر کوٹ رادھاکشن سے اوکاڑہ آ رہی تھی کہ نیشنل ہائی وے رینالہ خورد بائی پاس پر تیز رفتار ٹرالر نے ٹکر مار دی جس کے نتیجے میں رسولاں بی بی اور اس کا تین سالہ بیٹا پرویز جاں بحق ہو گئے جبکہ ان کا عزیز شدید زخمی ہو گیا۔ ٹرالر ڈرائیور حادثہ ہوتے ہی موقع سے فرار ہو گیا ہے۔ سرگودھا  سے نامہ نگار کے مطابق سرگودھا ریجن کے علاقہ میانوالی کے قریب مزدوروں کو لے جانے والا ڈالا دھند کے باعث فٹ پاتھ سے ٹکرا کر الٹ گیا جس کے نتیجہ میں نوجوان محمد عمران جاں بحق اور اس کا بھائی عبدالرزاق دیگر ساتھیوں سمیت زخمی ہو گیا۔ جبکہ مٹھہ ٹوانہ کے گاؤں جبی موڑ کے قریب موٹرسائیکل اور ٹریکٹر ٹرالی کے تصادم ایک نوجوان جاں بحق اور دوسرا شدید زخمی ہو گیا۔