لاہور (نیٹ نیوز) معروف گلوکارہ لتا منگیشکر اور سونو نگم سمیت دیگر کے استاد ’استاد غلام مصطفیٰ خان‘ ممبئی میں انتقال کر گئے۔ بھارت کی کلاسیکل موسیقی کے استاد غلام مصطفیٰ خان کا تعلق رام پور کے سہاسوان گھرانے سے تھا اور وہ طویل عرصے سے بیمار تھے۔ گزشتہ سال 89 سالہ استاد غلام مصطفیٰ پر فالج کا حملہ ہوا تھا۔ آج وہ ممبئی میں انتقال کرگئے۔ استاد غلام مصطفیٰ خان نے متعدد گانوں میں آواز کا جادو جگایا ہے جبکہ کئی گانوں کو موسیقی بھی دی ہے۔ بھارتی حکومت نے استاد غلام مصطفیٰ خان کو ان کی خدمات پر 1991 میں پدما شری، 2003 میں سنگیت ناٹک اکیڈمی ایوارڈ، 2006 میں پدما بھوشن اور2018 میں پدما وبھوشن ایوارڈ دیا تھا۔ استاد مصطفیٰ خان کے شاگردوں میں اے آر رحمان  اور شان سمیت کئی شامل ہیں۔ ان کے انتقال پر لتا منگیشکر اور سونو نگم سمیت متعدد شخصیات نے دکھ اور افسوس کا اظہار کیا ہے۔