منڈی بہاؤالدین‘ اسلام آباد(نامہ نگار+این این آئی) پیپلز پارٹی گوجرانوالہ کے ڈویڑنل صدر اور بانی کارکن دیوان شمیم اختر انتقال کرگئے۔خاندانی ذرائع کے مطابق وہ پچھلے کچھ روز سے علالت کے باعث زیر علاج تھے۔ دیوان شمیم اختر کے انتقال پر پیپلز پارٹی کے رہنماؤں کارکنوں اور شہریوں کی جانب سے گہرے دکھ کا اظہار کیا جارہا ہے۔ پیپلزپارٹی پارلیمنٹرینز کے صدر آصف علی زرداری نے دیوان شمیم کے انتقال پر گہرے رنج و غم اور صدمے کا اظہار کرتے ہوئے کہا جیالے کے انتقال پر بہت افسردہ ہیں۔دیوان شمیم پارٹی کے سابق صدر اور نظریاتی ساتھی تھے ۔ان کی پارٹی کے لئے خدمات اور وفاداری ناقابل فراموش ہے۔ سابق صدر نے مرحوم دیوان شمیم کے خاندان سے دلی ہمدردی اور تعزیت کا اظہار کرتے ہوئے مرحوم کی مغفرت اور ان کے لئے بلند درجات کی دعا کی۔ان کا انتقال لاہور کے ایک ہسپتال میں ہوا۔ شمیم اختر اعلیٰ تعلیم یافتہ اور ذوالفقار علی بھٹو کے دیرینہ کارکن تھے۔ وہ تمام زندگی بھٹو کے مشن کی تکمیل میں رہے۔ مرحوم کی میت لاہور سے منڈی بہاؤ الدین منتقل کی گئی۔