فیصل آباد‘ کامونکے‘ گوجرانوالہ (آن لائن‘ نامہ نگار‘ اے پی پی)  فیصل آباد میں ٹرک کی ٹکر سے  موٹر سائیکل سوار دو لڑکے جاں بحق جبکہ ایک بچہ زخمی ہوگیا۔ کامونکے  ٹول پلازہ کے قریب مزدا نے تین کزنوں کو کچل کر موت کے گھاٹ اتار دیا۔ تفصیلات کے مطابق  فیصل آباد  سے آن لائن کے مطابق  سمندری روڈ روشن والا ٹوٹل  پمپ کے قریب ٹرک کی موٹر سائیکل کو ٹکر کے نتیجہ میں بارہ سالہ مجاہد اور 18 سالہ ہارون موقع پر جاں بحق، دس سالہ اظہر شدید زخمی ہوگیا۔ کامونکے سے نامہ نگار اور گوجرانوالہ سے اے پی پی کے مطابق ٹول پلازہ کے قریب تیز رفتار مزدا ٹرک نے تین کزن بھائیوں کو کچل کر موت کے گھاٹ اتار دیا۔ عالمگیر روڈ محلہ ماتا رانی کے تین کزن اٹھائیس سالہ شہروز، پچیس سالہ سفیر اور چھبیس سالہ شاہ زیب موٹرسائیکلوں پر گوجرانوالہ سے کھانا کھا کر واپس گھر آرہے تھے۔ ٹول پلازہ کے قریب ٹرالر کے ساتھ بے قابو ہوکر موٹرسائیکل ٹکرایا جبکہ اسی دوران تیسرا کزن جب ان کے قریب پہنچا تو اسے بھی عقب سے آنیوالے تیز رفتار منی ٹرک نے کچل دیا۔ حادثے کے باعث تینوں کزن موقع پر ہی جاں بحق ہوگئے۔ ڈرائیورز موقع سے فرار ہونے میں کامیاب ہوگئے۔ جبکہ جاں بحق ہونے والے دو نوجوانوں کو آہوں اور سسکیوں میں نماز جنازہ کے بعد آبائی گاؤں پرانا گھنیاں میں سپردخاک کردیا گیا ہے جبکہ تیسرے نوجوان کے والدین سپین سے واپس آنے پر دو روز بعد سپرد خاک کیا جائے گا۔