لاہور(سپورٹس ڈیسک) جنوبی افریقی بیٹسمین وینڈر ڈوسین نے کہاہے کہ پاکستان نے فیلڈنگ سیٹ کرنے میں ہماری نقالی کی۔ پروٹیز کپتان کوئنٹن ڈی کوک کرکٹ کی گہری سمجھ بوجھ رکھتے ہیں، کراچی ٹیسٹ کی پہلی اننگز میں انھوں نے اتنی اچھی فیلڈنگ سیٹ کی کہ پاکستان نے بھی نقل کرتے ہوئے یہی طریقہ کار اپنایا۔انھوں نے کہا کہ ٹاس جیت کر پہلے بیٹنگ کا فیصلہ کرنے کے بعد ہمیں 350کے قریب مجموعہ حاصل کرنا چاہیے تھا مگر چند بیٹسمینوں کو کنڈیشنز سے مطابقت پیدا کرنے میں مشکل پیش آئی،راولپنڈی میں موسم مختلف ہے، پچ سے زیادہ تر گھاس کاٹ دی گئی ہے، میرے خیال میں نئی گیند سے بھی بائولرز کو زیادہ مدد ملنے کا امکان نہیں۔ کھلاڑی کنڈیشنز سے ہم آہنگی کیلئے اچھی ٹریننگ کررہے ہیں، کوشش ہوگی کہ بہتر کارکردگی پیش کرتے ہوئے پنڈی ٹیسٹ جیت کر سیریز برابر کریں۔